Браќа земљаци и мили
комшии!
Ние, вашите вечни комшии, пријатели и познаници од убавото Крушево
и неговите китни села, без разлика на вера, народност, пол и убедувања,
не можејќи веќе да ја трпиме тиранијата на жедните за крв и гладните
за човечко месо муртати, што гледаат и нас и вас да не дотерат
до нож, и нас и вас да дотераат до питачки стап и нашата мила
и богата земја Македонија да заприлега на пуста пустиња, денеска
дигнавне глава и решивне со пушка да се браниме од тие наши и
ваши душмани и да добиеме слобода.
|
Вие мошне арно знаете
оти ние не сме лоши и разбирате оти од мака си ја кладовме главата
в торба, за да заживееме како браќа на оваа земја, ние ве имаме
како свои и сакаме до крај да останиме свои. Ние не дигнавне пушка
против вас - тоа би било срам за нас; ние не дигнавне пушка против
мирниот, трудољубивиот и чесниот турски народ, што се прехранува,
како нас со крвав пот - тој е наш брат и со него сме живеале и пак
сакаме да живееме; ние не излеговме да колеме и да грабаме, да палиме
и да крадеме - доста ни се зулумите на безбројните деребеи по нашата
сирота и окрвавена Македонија; ние не излеговне да порисјанчуваме
и да ги бесчестиме вашите мајки и сестри, жени и ќерки; треба да
знаете оти вашиот имот, вашиот живот, вашата вера и вашата чест
ни се толку скапи, колку што ни се скапи нашите. Анџак, за да си
завардиме имотот, животот, верата и честа, ние сме зеле пушка. Ние
не сме муртати на својата земја, што не родила, ние не сме арамии
и јанкесеџии, ами ревомуционери под клетва да умреме за правото
и за слободата; ние се бунтуваме против тиранијата и против ропството:
ние се бориме и ќе се бориме против муртатите, против арамиите,
против зулумќарите и јанкесеџите, против насилниците на нашата чест
и на нашата вера и против тие што ја користат нашата пот, и го експлоатираат
нашио труд. Од нас, и од нашите села да не се плашите - никому зијан
не ќе сториме. Ние не само ве имаме како свои браќа, туку и ве посакуваме
како свои браќа, бидејќи разбираме оти и вие сте робје како нас,
робје на царот и на царските бегови, ефендии и паши, робје на богатите
и на силните, робје на насилниците и на зулумќарите, што ја запалија
царштината од четирите страни и што не натераа нас да дигнеме глава
за право, за слобода и за човечки живот. За право, за слобода и
за човечки живот ве каниме и вас да дојдете заедно да водиме борба!
Елате, браќа муслимани, при нас да тргниме против вашите и наши
душмани! Елате под бајракот на “Автономна Македонија”! Македонија
е заедничка наша мајка и повикува за помош. Елате да ги скршиме
синџирите на ропството, да се куртулиме од маки и страданија, и
да ги пресушиме реките од крв и солзи! Елате при нас, браќа да си
ги слееме душите и срцата и да се спасиме, та ние и нашата чељад
и пречељад да живеат мирно, да си работат спокојно и да напредуваат!...
|
|
Мили наши комшии!
Како Турци, Арнаути и муслимани, разбираме, вие си мислите, оти
царството е ваше и оти вие не сте робје, штом на царскиот бајрак
нема крст, а има ѕвезда и месечина. Оти не е така и оти грешите,
вие брго ќе се сетите и ќе разберете. Ама ако ви е намуз да дојдете
при нас и да се објавите против царската тиранија, ние, вашите по
татковина и по страданија браќа, нема да се докачиме и не ќа ве
мразиме. Ние сами ќе се бориме и за нас и за вас, ако е потребно,
до еден ќе умреме под бајракот за нашата и ваша слобода и за нашето
и ваше право. “Слобода или смрт” е пишано на нашите чела
и на нашиот крвав бајрак. Ние веќе го дигнавне тој бајрак и нема
враќање. Ако и вие не имате како ваши браќа и ни сакате добро, ако
есапите пак да живеете со нас, како што сте живеале до сега и ако
сте верни и достојни синови на мајка Македонија, можете да ни поможите
само со едно нешто - а тоа е голема помош. Да не се заортачите со
душманите, да не дојдете со пушка против нас и да не праете зулуми
по рисјанските села! |
|
Нека Господ Бог ја благослови
светата борба за правото и слободата! |
|
Нека се живи борците
за слободата и сите чесни и добри македонски синови! |
|
Ура! За “Автономна
Македонија”! |
|
|